कंडारी येथील बहरलेल्या गोदावरी तुरीच्या प्रक्षेत्रास मा. कुलगुरु मिश्रा यांची भेट.
दिनांक 24 नोव्हेंबर 2023 रोजी माननीय कुलगुरू इंद्र मनी मिश्रा, वनामकृवी परभणी यांनी कृषी संशोधन केंद्र बदनापूर येथील शास्त्रज्ञा समवेत गोदावरी वाणाची लागवड केलेल्या शेतकऱ्याच्या शेतावरती भेट दिली. सध्या कंडारी तालुका बदनापूर येथे दोनशे एकर क्षेत्रावर गोदावरी वाणाची लागवड करण्यात आली आहे अशी माहिती येथील शेतकरी राजेंद्र शिंगारे यांनी दिली. राजेंद्र शिंनगारे यांनी 2020 मध्ये एक किलो गोदावरी वाणाचे बियाणे कृषी संशोधन केंद्र बदनापूर येथून आणले. त्यांनी गेल्या तीन वर्षांमध्ये आपल्याकडील बियाणे इतर शेतकऱ्यांना दिले. दोन वर्षांमध्ये गोदावरी वाणाची 18 क्विंटल पर्यंत प्रति एकरी उत्पादन शेतकऱ्यांना मिळाल्याचे राजेंद्र शिंगारे यांनी माहिती दिली. उत्पादकता पाहता शेतकऱ्यांच्या पसंतीस उतरल्यामुळे शेतकऱ्यांनी मोठ्या क्षेत्रावर गोदावरी वाणाची लागवड केली आहे.
बद्रीनाथ फटाले, कंडारी यांनी 25 मे रोजी गोदावरी वाणाची लागवड केली. केवळ 10: 26:26 नत्र स्फुरद पालाश 100 किलो प्रति एकरी आणि आतापर्यंत केवळ एक कीटकनाशकाची फवारणी केली आहे.
इतक्या कमी लागवड खर्चा वरती एकरी वीस क्विंटल तुरीचे उत्पादन मिळेल अशी आशा त्यांनी यावेळी व्यक्त केली.
कृषी संशोधन केंद्र बदनापूर द्वारे विकसित केलेले वाण बीडीएन २, बीडीएन ७११ आणि नव्याने प्रसारित केलेली गोदावरी केवळ राज्यपातळीवर नव्हे तर देशपातळीवर शेतकऱ्यांच्या पसंतीस उतरले आहेत याबद्दल उपस्थित शेतकऱ्यांना माननीय कुलगुरूंनी माहिती दिली. आणि म्हणूनच यांची लागवड महाराष्ट्रातच नव्हे तर गुजरात सारख्या राज्यांमध्ये सुद्धा होत असल्याचे दिसून येत असल्याचे नमूद केले. कमीत कमी लागवड खर्च आणि अधिक उत्पादन याचा विचार करता तुरी सारख्या पिकाला शेतकऱ्यांनी प्राधान्य देणे गरजेचे असल्याचे माननीय कुलगुरू यांनी यावेळी उपस्थित शेतकऱ्यांना सल्ला दिला आणि अशाच पद्धतीने नवीन नवीन तंत्रज्ञानाचा प्रसार शेतकऱ्यांमध्ये होण्याची गरज असल्याचे नमूद केले.
यावेळी कृषि संशोधन केंद्राचे, प्रभारी अधिकारी डॉक्टर केटी जाधव, डॉक्टर डी के पाटील, कृषी महाविद्यालयाचे सहयोगी अधिष्ठाता तथा व प्राचार्य, डॉक्टर आर डी अहिरे, कृषी विज्ञान केंद्राचे प्रमुख, डॉक्टर सचिन सोमवंशी, डॉक्टर पी ए पगार, डॉक्टर गीते आणि ईतर शास्त्रज्ञ उपस्थित होते.
